مليــار خادم الحرمين للعراق

كتب : أحمد مكيه 

 الملك سلمان بن عبدالعزيز  .. يمنح العراق مليار دولار لتنفيــــذ مشاريع خدمية في العراق ..

جلالة الملك.. رحمة لوالديك .. ياريت تكمل فضلك ، وتدز ويه هذا المليار ناس تديــــر المشاريع اللي راح تسووهه بالعراق وتوصيهم ، مايصرفون أي فلـس الا يشوفون هاي المشاريع بعينهم وما يعتمدون على سوالف وكلاوات جماعتنه اللي راح يسوون الهور مـرگ والبردي خواشيــگ وتالي كل المشاريع تطلع وهمية  ..

وياريت جلالتكم توصي ربعك انه هذا المليار ماينـصرف منـه فلس احمـر عالارصفة، والمقرنص، والطرق الخدميـة للزوار، والبوسترات، وانه تم انشاء هذا المشروع برعاية رئيـس الوزراء الفلاني ، واشــراف السيد الوزير العلاني ، ومن هالخريـط اللي ماقبضـنه منه أي شي بالـ ١٦  سنه الماضية  .. 

ولاتنسى جلالتكم تشرط عالحكومة انه ولا فلـس من هذا المليار يطيح بيـد رجل دين، او بيد عضـو مجلـس محافظـة ، لان ذولي مثل المگبره مايردون ميت ، والفلـس اللي يطيـح بإديهم اقــره عليه السلامه ..

وياريت جلالتكم يشرط عالحكومة العراقية ان هذا المليار ما تتدخل بيه المكاتب الاقتصادية للاحزاب

وياريت جلالتكم .. توصون ربعكم بإستبـــــعاد أي مقـــــاول أو مهندس عراقي واللي اغلبيتهم تعلمو عالشغل التلزيگ ..

وياريت ماتبيعون أي مشروع لمقاول ثانوي ، ولاشركة ثانوية ، ولا عقد بالباطن مثل ماصار بكل مشاريع الدولة العراقية بعد ٢٠٠٣

من الاخير جلالتكم .. اذا ببالكم تساعــــدون الشعب العراقي وتخلصوه من بعض المحن والمعاناة اللي يمر بيهه اخـــذ ملاحظاتي بنظر الاعتبار  وجزاك الله خير الجزاء ..

واذا ببالك تلبسني و تسلم هذا المليـــــــار للحكومــــة ، والحكومة هــي اللي تتصرف فالعوض والخلف علـى الله .. وحسبــنا الله ونعم الوكيـل ، ولا حول ولاقــوة الا بالله العلي العظيـم !! وشلون متريد تفهمهه افهمهه ..

احمد_مكيه



لا توجد تعليقات


اترك تعليق

لن نظهر بريدك الالكتروني - الحقول (*) مطلوبة *